अब सरकार चलाउन तमसुक गर्नु पर्देन

दिपेन्द्र अधिकारी
भरतपुर । नेकपा एमालेका अध्यक्ष केपी शर्मा ओलीले चुनाव पछि देशमा वाम गठबन्धनको बहुमतको सरकार बन्ने बताएका छन् ।
बहुमतको सरकार बन्ने निश्चित रहेको बताउँदै ओलीले भने,‘अब तमसुक गरेर नौ नौ महिनामा सरकार फेर्ने दिन गए ।’ मंगलबार चितवनको भरतपुरमा आयोजित वाम गठबन्धनको जनसभालाई सम्बोधन गर्दै ओलीले वाम एकताले अस्थिर सरकार बन्ने नजिर समाप्त भएको बताए ।
बहुमत प्राप्त गरेर पनि कांग्रेसले जनभावना अनुसार काम नगरेको भन्दै अध्यक्ष ओलीले आगामी चुनावबाट देशभरी नै वाम गठबन्धनका उम्मेदवार विजयी भई बहुमतको सरकार बन्ने र जनताको चाहना अनुसार ५ वर्षसम्म निरन्तर सरकार चलाउने बताए । आँधी तुफानको रुपमा आएको गठबन्धनको चुनावी माहोलले कांग्रेसको धोद्रो रुख ढाल्ने अध्यक्ष ओलीले बताए ।
देश बनाउन पाँच वर्ष स्थायी सरकार निर्माण गर्ने र देशमा विकासको लहर सिर्जना गर्ने उनको भनाइ थियो । कम्युनिस्ट सरकार बन्ने भयो भनेर नआत्तिन कांग्रेसलाई ओलीले आग्रह गरे ।
प्रचण्डले सम्बोधन गरेनन्
चुनावी सभामा उपस्थित भएका नेकपा माओवादी केन्द्रका अध्यक्ष पुष्पकमल दाहाल प्रचण्डले सभामा सम्बोधन भने गरेनन् । ओली बोल्नु अघि प्रचण्डसँग बोल्ने नबोल्ने विषयमा सोधिएकोमा उनले नबोल्ने बताएपछि ओलीले सभामा सम्बोधन गरेका थिए । झण्डै ३५ मिनेट सम्बोधन गरेका ओलीले सभामा बोलेका सबै कुरा प्रचण्डको समेत भएको बताएपछि जनसभामा उपस्थितले ताली पिटेका थिए । कार्यक्रम निर्धारण गर्दा प्रचण्डले नबोल्ने भनिएकोमा अन्तिम समयमा बोल्न सकिन्छ कि भनी प्रस्ताव गर्दा उनले बोलेनन् ।
३० हजार मतान्तरले जित्नुपर्छ
आमसभालाई सम्बोधन गर्दै अध्यक्ष ओलीले मञ्चमा आशिन गठबन्धनका प्रमुख नेता माओवादी केन्द्रका अध्यक्ष प्रचण्डलाई देखाउँदै भने,‘अरु म जान्दिन प्रचण्डले थोरैमा पनि ३० हजार भोटले जित्नुपर्छ ।’ ‘देश बनाउनु भनेको कुनै बाटोघाटो बनाउनु, ठेक्का पार्नु जस्तो होइन,’ चितवन क्षेत्र नम्बर ३ का प्रतिनिधिसभाका प्रचण्डका प्रत्याशी विक्रम पाण्डे प्रति लक्षित गर्दै अध्यक्ष ओलीले भने,‘साँच्चै देश बनाउनका लागि प्रचण्डको आवश्यकता छ, उहाँलाई भारी मतले जिताउने जिम्मा चितवनवासीको हो ।’

सरकार उदासिन
पूर्वप्रधानमन्त्रीसमेत रहेका एमाले अध्यक्ष ओलीले देशव्यापी रुपमा उम्मेदवारलाई आक्रमण हुँदा पनि सरकार आँखा चिम्लेर बसेको आरोप लगाए । नेता, जनताको माया नगर्ने र शान्ति कायम गर्न नसक्नेले देशलाई समृद्ध बनाउन नसक्ने उनको भनाइ थियो । चुनाव सार्ने योजनाका साथ चुनाव विरोधी गतिविधि भएको भन्दै ओलीले चुनाव कुनै पनि हालतमा सम्पन्न हुने बताए । काम चलाउ सरकारले चुनाव शान्तिपूर्ण गराउनुको सट्टामा सम्झौता खारेज गर्ने, मन्त्री थप्ने जस्ता काम गरेको ओलीले बताए ।
सबैले सम्झिए प्रकाशलाई
३ गते निधन भएका माओवादी केन्द्रका केन्द्रीय सल्लाहकार तथा प्रचण्डका छोरा प्रकाश दाहालको सबैले सम्झना गरे । बोल्ने क्रममा एमाले अध्यक्ष ओलीले नयाँ समयको नयाँ सपना बोकेको युवाको रुपमा प्रकाशलाई सम्झिएका थिए । उनको निधनका कारण भरतपुरको आमसभामा झाँकी, ¥याली आयोजना गरिएको थिएन । प्रकाशको योगदान र भूमिकाको बारेमा चर्चा गर्दा प्रायः सहभागीहरुको अनुहार मलिन र आँखा रसाएका थिए । प्रकाशलाई सम्झँदै माओवादी नेता राम बहादुर थापा बादलले भने,‘एउटा भविष्य गुमाउनु पर्दा पीडा बोध भएको छ ।’
प्रकाशको राजनीतिक जीवन सम्झँदै गर्दा ओली, बादल, मातृका यादव, सुरेन्द्र पाण्डेलगायतका नेताले उनका बुबा प्रचण्ड र आमा सीता दाहाल उदाहरणीय सहनशील व्यक्तिहरु रहेको प्रतिक्रिया दिए ।

मञ्चमै नमूना मतदान
चुनावी सभामा वक्ताहरुले वाम गठबन्धनलाई बलियो बनाउनका लागि कार्यकर्ता र जनता शंकाउपशंकामा रहन नहुने बताउँदै गर्दा वाम गठबन्धनको पुष्टि गर्न मञ्चमै एमाले अध्यक्ष ओलीले माओवादीको चुनाव चिह्न हसिँया हथौडा र प्रचण्डले एमालेको चुनाव चिह्न सूर्यमा एक साथ मतदान गरेका थिए । उनीहरु मतदान गर्दा उपस्थित सबै जनता उठेर लामो समयसम्म ताली पिटेका थिए । उनीहरुको उक्त कामले जनतामा सकारात्मक सन्देश गएको सहभागीहरुले बताए ।
प्रचण्डलाई समर्थन
चितवन निर्वाचन क्षेत्र नम्बर ३ बाट प्रतिनिधिसभाका उम्मेदवार रहेकी नेपाल सर्वहारा कम्युनिस्ट पार्टीकी अध्यक्ष भावना विद्रोहीले आमसभामा सम्बोधन गर्दै आफ्नो समर्थन माओवादी अध्यक्ष प्रचण्डलाई रहेको बताइन् । सोही कार्यक्रममा नेपाली कांग्रेस निकट प्रजातान्त्रिक सेनानी संघका पूर्वकेन्द्रीय सदस्य चितवन रत्ननगर–११ जिरौना निवासी त्रिलोचन पौडेल नेकपा एमालेमा प्रवेश गरेका छन् । उनीसँगै १०० बढी कांग्रेस र राप्रपा प्रजातान्त्रिकका उम्मेदवारहरु वाम गठबन्धनमा प्रवेश गरेका हुन् ।
झुटको खेती नगर ः नेपाल
नेकपा एमालेका वरिष्ठ नेता माधवकुमार नेपालले नेपाली कांग्रेसलाई झुटको खेती नगर्न चेतावनी दिए । भरतपुरमा आयोजित वाम गठबन्धनको जनसभालाई सम्बोधन गर्दै नेता नेपालले कम्युनिस्ट विरुद्ध अफवाह फैलाएर कांग्रेसले भ्रम फैलाउन खोजेको तर जनता सचेत भएकाले वाम गठबन्धनलाई कुनै असर नगर्ने बताए । कम्युनिस्टको सरकार आए देशमा एकदलीय शासन आउँछ भनेर कांग्रेसले गलत प्रचार गर्दै हिँडेको बताउँदै नेता नेपाललेजनतासँग कम्युनिस्टको सम्बन्ध माछा र पानीको जस्तै भएको बताए ।
नेता नेपालले माओवादी केन्द्रका अध्यक्ष प्रचण्डलाई चितवनमा उम्मेदवारका रुपमा पाउनु चितवनबासीका लागी गौरबको कुरा भएको बताए । नेता नेपालले माओवादी केन्द्रका अध्यक्ष प्रचण्डलाई आफ्नै पार्टीको नेता सम्झेर भोट हाल्न एमाले कार्यकर्तालाई निर्देशन दिए ।

फोटो
चुनावी सभामा बोल्दै केपी ओली र हात हल्लाउँदै दुइ शीर्षस्थ नेताहरु ।

 

 

 

The post अब सरकार चलाउन तमसुक गर्नु पर्देन appeared first on चितवन पोष्ट.